by Vanessa Goosen | Mar 19, 2024 | Vir die ouers
By Laerskool Anton van Wouw verstaan ons dat Graad 1 ‘n deurslaggewende mylpaal in u kind se opvoedkundige reis is. Dit lê die grondslag vir toekomstige leer en berei die weg voor na akademiese sukses. As trots Afrikaans medium laerskool glo ons vas in die krag van moedertaalonderrig, veral gedurende hierdie vormingsjare. In hierdie artikel sal ons die belangrikheid van Graad 1 ondersoek en hoe die aanbied van onderwys in jou moedertaal voordelig kan wees vir ‘n kind se leer en ontwikkeling.
DIE BETEKENIS VAN GRAAD 1 IN JOU KIND SE SKOOLLOOPBAAN
Graad 1 is die begin van formele onderwys en is ‘n belangrike stap in jou kind se skoolloopbaan. Gedurende hierdie jaar ontwikkel kinders noodsaaklike vaardighede en kennis wat as boustene vir toekomstige leer sal dien. Sommige van die deurslaggewende aspekte van Graad 1-onderwys sluit in:
1. Geletterdheid en syfervaardighede
In Graad 1 leer kinders die grondbeginsels van lees, skryf en wiskunde. Hulle begin letters, klanke en woorde herken, en ontwikkel basiese syfervaardighede soos tel, optel en aftrek. Hierdie vaardighede vorm die grondslag vir hulle skoolloopbaan asook daarna.
2. Sosiale- en Emosionele Ontwikkeling
Graad 1 is ook wanneer kinders belangrike sosiale- en emosionele vaardighede aanleer. Hulle leer om met hul maats te kommunikeer, te deel, beurte te maak en om konflik op te los. Hierdie vaardighede is noodsaaklik vir die bou van gesonde verhoudings en om sosiale situasies regdeur hul lewens te bestuur.
3. Onafhanklikheid en verantwoordelikheid
Soos kinders Graad 1 betree, begin hulle ‘n gevoel van onafhanklikheid en verantwoordelikheid ontwikkel. Hulle leer om instruksies te volg, take onafhanklik te voltooi en eienaarskap van hul skoolwerk te neem. Hierdie vaardighede is deurslaggewend vir hulle akademiese vordering.
DIE VOORDELE VAN MOEDERTAALONDERWYS IN GRAAD 1
By Laerskool Anton van Wouw glo ons om onderrig in jou moedertaal te ontvang, veral in Graad 1. Die volgende redes is vir ons belangrik:
1. Verbeterde kognitiewe ontwikkeling
Navorsing het getoon dat kinders wat onderrig in hul moedertaal ontvang, beter kognitiewe ontwikkeling het. Hulle is in staat om konsepte makliker te begryp, krities te dink en probleme meer effektief op te los. Dit is omdat hulle in staat is om inligting te verwerk in ‘n taal wat vir hulle bekend en gemaklik is.
2. Verbeterde akademiese prestasie
Kinders wat in hul moedertaal leer, is geneig om akademies beter te presteer. Hulle het ‘n dieper begrip van die onderwerp en is in staat om hulself duideliker uit te druk. Dit is veral belangrik in Graad 1, aangesien die volume van nuwe vaardighede wat aangeleer word, hoog is.
3. Sterker kulturele identiteit
Om in moedertaal te leer, help kinders om ‘n sterk gevoel van kulturele identiteit te ontwikkel. Hulle is in staat om met hul erfenis, tradisies en waardes te skakel, wat bydra tot hul algehele gevoel van behoort en die bou van ‘n sterk selfbeeld.
By Laerskool Anton van Wouw is ons daartoe verbind om moedertaalonderrig van hoë gehalte in Afrikaans te verskaf. Ons ervare en toegewyde onderwysers skep ‘n koesterende en stimulerende leeromgewing wat akademiese uitnemendheid en persoonlike groei bevorder. Ons glo dat deur kinders in hul moedertaal op te voed, ons hul volle potensiaal ontsluit en hulle voorberei vir sukses op skool en in die lewe.
As jy op soek is na ‘n laerskool wat moedertaalonderrig waardeer en toegewy is aan jou kind se holistiese ontwikkeling, oorweeg gerus Laerskool Anton van Wouw. Besoek ons webwerf [https://laerskoolantonvanwouw.co.za/] om meer te wete te kom oor hoe ons jou kind kan help floreer.
by Marica Botha | Jan 30, 2024 | Vir die ouers
Deur Mariette Snyman
“Dis vir die meeste ouers van jong kinders ’n groot uitdaging,” sê dr. Shirley, ’n algemene praktisyn met ’n spesiale belangstelling in neurologiese toestande. “Huiswerk word gewoonlik aan die einde van die dag ingepas. Dopamien, die breinhormoon verantwoordelik vir wakkerheid en motivering, is smiddae op sy laagste en ná ’n vol dag is kinders boonop sensories oorlaai. Dis ’n slegte tyd vir ’n herhalende, vervelige aktiwiteit.
“Omdat kinders tuis veilig voel en vertrou dat hul ouers, hulle ondanks swak gedrag steeds sal liefhê, kan hulle ekstra moeilik wees. G’n wonder Finland – algemeen beskou as die land met die mees ontwikkelde onderwysstelsel – skeduleer smiddae geen akademiese werk behalwe lees nie. In Suid-Afrika is ons nog nie so gelukkig nie, maar ons kan wel die lewe vir ons en ons kinders makliker maak.
10 praktiese wenke wat dit vir almal makliker maak:
- Skep ʼn huiswerkhoekie
Nes ons ’n slaapkamer met slaap assosieer, help dit as jou kind se brein ’n sekere hoekie met huiswerk en ’n leeringesteldheid verbind. As die ruimte beperk is, kan jy sommer ’n hoekie van ’n kamer met maskeerband afbaken.
Minimaliseer afleiding indien jou kind se aandag maklik afgelei word. Sê: “Ek skakel my foon vir 20 minute af en gaan by jou sit en werk/lees/brei. Ons hou Boetie uit die vertrek.”
Sorg vir ’n gemaklike temperatuur.
Party kinders kan met musiek leer, ander nie. Eksperimenteer met wit geraas soos ’n waaier in die agtergrond, musiek sonder woorde, ensovoorts. Vir brain sequencing is Bach en Mozart die stimulerendste.
As jou kind se sensoriese integrasie nie optimaal is nie – soos by alle kinders met aandagafleibaarheid/hiperaktiwiteit – kan diep druk op jou kind se skoot of skouers strelend wees. Probeer ’n weighted jacket of kombers; die graansakkies wat fisioterapeute verskaf; ’n hondjie-deurstopper vol sand; of ’n teddiebeer wat ’n paar kilogram weeg. Die graansakkies kan warmgemaak of in die vrieskas gesit word. Eksperimenteer!
Kyk watter uitwerking verskillende geure het. Party is kalmerend, soos laventel; ander stimulerend, soos peperment. Koop suiwer essensiële olies met net een geur.
- ʼn Volledige werkstasie
Hou ’n volledige stel benodigdhede in die huiswerkhoekie. Geen huisgenoot mag dit leen nie! As jou kind eers moet opstaan om ’n skerpmaker te gaan haal, verbreek dit sy konsentrasie.
- Spring reg weg
Laat jou kind kies waarmee hy/sy wil begin – verkieslik eenvoudiger take. Verduidelik dat ’n makliker wegspringplek jou kans op sukses verbeter omdat jou brein ook “opwarm”. Ouer kinders kan met die moeilikste taak begin, terwyl hulle nog vars is.
- Hou ʼn ogie
Help ’n jong kind aanvanklik deur by hom/haar te sit of, as jy nie kan nie, vra van tyd tot tyd: “Hoe vorder jy? Kan ek help?”
- Skep asem
Sorg dat jou verwagtinge van jou kind se studievermoë realisties is. Dit is verstandig om te breek vóór jou kind se brandstof opraak. Gebruik ’n uurglas sodat jou kind die tydsverloop kan sien, en sê: “Kom ons doen vyf (of tien) minute lank wiskunde totdat die sand deurgeloop het.”
ʼn Pouse van vyf minute kan jou kind help herlaai.
Realistiese verwagtinge: graad 2 – twee sessies van vyf minute elk; graad 3 – 15 minute op ’n slag; graad 4 – 20 minute op ’n keer; kinders tot graad 7 – sessies van 40, dan 30, dan 20 minute. Selfs volwassenes behoort ná ’n werksessie van 45 minute te strek of ’n anders sensoriese breek te neem.
Eksperimenteer deur ’n kort pouse met ’n langer pouse af te wissel.
Mamma moenie ’n “pliggie” wees en deurdruk tot die werk klaar is nie – dis teenproduktief. Wanneer ’n kind te lank moet konsentreer, beland sy in beseringstyd, wat meer kwaad as goed doen. Respekteer jou kind se versadigingspunt; indien die huiswerk dit oorskry, kan jy ’n vriendelike briefie vir die onderwyser skryf en noem dat die kind werklik gefokus gewerk het maar nie die werk kon voltooi nie. Bespreek die huiswerklading met die onderwyser indien dit dikwels gebeur.
- Geduld, o geduld!
Sukseservarings lei tot groter sukses, terwyl skerp kritiek en die vrees vir mislukking ’n kind in oorlewingsmodus kan plaas. In die veg/vlugmodus het ons nie toegang tot hoër kognitiewe funksies nie. Probeer om nie ongeduldig te raak nie; kyk hoe jy kan help eerder as om die kind ontoereikend te laat voel. Op dié manier sal jou kind gouer onafhanklik kan werk – dis in jou belang!
- Spelpret
- Spelling is iets wat alle kinders moet leer. Die brein hou van afwisseling, ’n uitdaging en kompetisie – span dit tot julle voordeel in. Skryf die week se spelwoorde netjies op indekskaarte. Maak twee stelle en speel Snap!
- Skep ’n Bingo-bord. Pak een stel spelwoorde daarop. Laat jou kind die woorde spel. Vir elkeen wat hy reg het, is dit Bingo!
- Gebruik gekleurde pypskoonmakers om letters en syfers te buig en bou die spelwoorde daarmee.
- Speel “Vang Mamma uit”. Mamma skryf vier variasies van ’n spelwoord onder mekaar, byvoorbeeld K.L.O.U.T.E.R, klOUter, klouteR en kloutir, en laat die kind die verkeerd gespelde woord aandui.
- Skep ’n pak kaarte met opdragte wat sensories verskil, byvoorbeeld: Skryf die spelwoord in rooi/geel/groen, skryf dit in potlood/koki-pen/vetkryt, skryf dit twee/drie/vyf keer, sê die woord in ’n fluisterstem/ operastem/ robotstem. Laat jou kind elke keer ’n kaart trek en die opdrag uitvoer.
- Deesdae is daar ook penne met verskillende geure, byvoorbeeld ’n oranje pen met lemoengeur. Betrek dit by dié speletjie; die gebruik van verskillende sintuie skakel die geheue aan.
- Laat die kind haar oë toemaak en die woorde uitskryf.
- Steek die kaarte met spelwoorde weg op jou kind se roete van die etenstafel na byvoorbeeld haar tandeborsel. Sy moet elke kaart optel, lees en sê – ’n interessante vorm van herhaling.
- Mooi so!
- Beloon jou kind vir elke sessie. Ouers is soms bang hulle koop ’n kind om, maar volwassenes werk ook beter as daar belonings is. Navorsing wys positiewe versterking kan vyf keer kragtiger wees as die vrees vir onaangename gevolge.
- Pak weg
- Maak seker jou kind het alles wat nodig is vir die volgende skooldag, en dat die boeksak gepak is en by die voordeur wag.
- Vier dit!
- Doen ná elke sessie iets lekkers saam – dit skep die gevoel van “ek hoort hier, ek het ’n plek”. Speel vinnig ’n speletjie, jaag mekaar, dans ’n dansie, vertel elkeen ’n grappie, luister na ’n liedjie, vertel van julle dag, slaan iets in die kombuis aanmekaar of gaan kielie vir Pappa. Al weet jy wat jou kind se liefdestaal is, spel alle kinders liefde só: “tyd” en “aandag”.
by Vanessa Goosen | Nov 21, 2023 | Vir die ouers
Dit gaan nie oor die kurrikulum nie – elke skool in Suid-Afrika behoort die kurrikulum ten volle te implementeer… dit gaan oor hóé elke enkele aspek van die kurrikulum in diepte onderrig word! By Laerskool Anton van Wouw is dít wat ons doen! Die laerskool is die plek waar ‘n jong kind se akademiese grondslag baie stewig gelê moet word, dán “vlieg” hulle in die hoërskool en dit maak deure oop vir baie beroepsgeleenthede.
Akademiese uitnemendheid is iets wat elke ouer vir sy kind wíl hê… en dit is wat Laerskool Anton van Wouw bied.
Dit gaan beslis nie nét oor die punte nie, maar om kritiese denkvaardighede, ‘n dors na kennis en ‘n passie en nuuskierigheid vir leer te ontwikkel.
Om ‘n volronde, akademies sterk kind hoërskool toe te stuur, begin reeds by ons puik toegeruste Wouwtjie Pre-primêr. Pas uit die doeke, vanaf gr. RRRR, word ons Kleinwouwtjies blootgestel aan ‘n skitterende ontwikkelingsprogram van perseptuele vaardighede… boublokke vir leer wat binne die eerste ses jaar van ‘n kind se lewe deeglik vasgelê moet word. Ons maak doodseker dat ons gr. R’e skoolgereed is teen die tyd wat hulle deur die hekke stap na die “groot” skool toe.
Die akademiese uitnemendheid van ‘n skool staan of val by wat binne die vier mure van elke klas, elke dag, gebeur. Daarom … investeer ons in die béste onderwysers wat self akademies goed onderlê is, ‘n passie vir onderwys en kinders het en altyd op die voorpunt van nuutste ontwikkelinge in die onderwys bly.
Wouwtjie-onderwysers onderrig volgens Blooms… dit beteken kennis word oorgedra; leerders word gestimuleer om te dink, hulle eie afleidings te kan maak, hulself te kan motiveer en kritiese denkvaardighede te ontwikkel. Dus… Wouwtjies is denkende leerders!
Wat kan ouers doen om akademiese vaardighede tuis te ontwikkel?
- Gesels met jou kind oor duidelike doelwitte. Beplan stap vir stap hoe om daar uit te kom.
Breek dit vir jou kind op in kleiner, verteerbare deeltjies… en stel ‘n tydlyn op.
- Tydsbestuur: Balanseer die akademie met ander aktiwiteite. Dit is baie belangrik vir enige kind om akademie, sport, kultuur, familietyd, lees, speel en ontspanning te balanseer.
- Leer jou kind om studietyd ‘n produktiewe tyd te maak… om te fokus. Jy as ouer moet sorg dat daar nie iets is wat jou kind se aandag aftrek nie.
- Prioritiseer akademie en stel vaste tydslotte in.
- Effektiewe studiemetodes: vind uit wat jou kind se spesifieke leertegnieke is.
- Gereelde hersiening van werk is baie belangrik.
- Kry hulp en ondersteuning… moenie bang wees om te vra nie! Praat met onderwysers, klasmaats werk lekker saam, ouer kinders werk lekker in studiegroepe, gebruik biblioteke, opvoedkundige toeps asook aanlyn-platforms.
Waardes wat vasgelê moet word:
- Glo in jouself!
- Moenie terugdeins vir uitdagings nie.
- Hanteer terugslae as geleenthede om te leer.
- Fokus op ‘n positiewe uitkyk in alle opsigte.
- Vier klein oorwinnings.
- Leer uit jou foute.
ONTHOU: Dit gaan níe net oor akademiese prestasie nie, maar ook die persoonlike groei en vaardighede wat jy leer in die proses, wat sal lei tot sukses in die toekoms.
by Vanessa Goosen | Oct 19, 2023 | Vir die ouers
Laerskool Anton van Wouw is toegewyd om nié net akademiese uitnemendheid te bevorder nie, maar om óók al ons leerders te help om op sport- en kultuurgebied blootstelling te kry en hul talente te ontwikkel. Net so, is dit vir ons baie belangrik om ons kinders se sosiale vaardighede en leierskap te ontwikkel én daarmee saam, om te sien na hul emosionele- en psigiese gesondheid.
Ons visie is om ’n gelukkige, selfstandige en “volronde” kind hoërskool toe te stuur!
Akademie:
Akademie is die ruggraat van Anton van Wouw se aktiwiteite. Om régtig uitnemend te wees, verg rotsvaste bestuur, uitnemende onderwysers, ondersteunende ouers en leergierige leerders.
Léés is die sleutel tot sukses op akademiese gebied; daarom doen ons báíe moeite om ons leerders lief te maak vir lees, van klein tot groot! Ons Boekklub en skrywers wat ons skool jaarliks kom besoek, is legendaries.
Kultuur:
Ons bied vierjaarliks ’n revue aan waaraan elke kind deelneem… ’n groot hoogtepunt! Só ook die Wouwtjie Kinderkoor wat pragtige sang afwissel met lekker koortoere en optredes – van die Drakensberge, tót in die Kaap! Hier hoor ons sangstemmetjies reeds in die gr.R-koor en ons Junior koor, wat ook die jaar die topkoor in die land is.
Wouwtjies woeker met woorde – van redenaars tot debat, is hulle kampioene!
Gr.6 en 7-leerders kan elke kwartaal ’n Toastmasterskursus bywoon en hulle nuutgevonde Engelse praatvaardighede tentoonstel tydens ‘n spogbanket.
Anton van Wouw het ’n groot musieksentrum nét hier op ons terrein, waar leerders ’n wye verskeidenheid instrumente kan leer bespeel!
Sport:
Anton van Wouw het beslis ’n passie vir sport! Sport is nié net ’n manier om ’n gesonde leefstyl aan te moedig nie, maar dit leer ook ons leerders belangrike lewenslesse, onder andere leierskap, samewerking in ’n groep, deursettingsvermoë en hoe om druk en stres te hanteer.
Ons fokus op massa-deelname in sport en bied alle bekende skoolsporte aan – asook fietsry, perdry en gholf. Hiér ontdek leerders hul talente, leer om kompeterend te wees en goeie sportmanskap uit te leef.
Die verhitte swembad is ’n groot aanwins vir Wouwtjies – hier kan nou dwarsdeur die jaar geoefen word en Wouwtjie-swem staan baie sterk!
In ’n neutedop… balans maak saak! ’n Gebalanseerde skoolopvoeding is die sleutel tot holisties gevormde, suksesvolle individue.
Dit is lékker om ’n Wouwtjie te wees!
by Marelize | Aug 8, 2023 | Vir die ouers
By Wouwtjies glo ons in die waarde van jou gesondheid!
Hier volg ‘n paar goue reëls om die pak van ‘n kosblik makliker te maak:
Reël 1
Beplan kospakkie-spyskaart ‘n week vooruit. Skryf dit neer en doen aankope daarvolgens.
Onthou plastieksakkie (verskillende groottes), klein houertjies met deksels vir sagte vrugte, doopsouse, papierservet en plastiekeetgerei (bv. lepel vir ‘n jogurt).
Reël 2
Kombineer verskillende opsies met mekaar sodat daar variasie is bv ‘n sagte perske met ‘n krakerige pretzels. As jou spruit sukkel om afstand te doen van witbrood vir ‘n toebroodjie, vervang een sny wit met volgraan, rog en witbrood, of vir die soettand volgraan en piesangbrood. Dit is belangrik om te oorweeg ook hoe die inhoud van ‘n kospakkie gaan lyk lyk nadat dit vir ‘n paar ure in ‘n kosblik gebêre is? Niemand is lus om ‘n papgedrukte, bruin piesang of verlepte slaai te eet nie.
Reël 3
Wissel water af met verdunde vrugtesappe, water en sodawater en tuisgemaakte vrugtessappe met water te meng.
Vries water oornag. Koue water bly verfrissend by die skool, maak ‘n eie soort “slush puppy” en as dit in die kosblik gebêre, word sal dit die ook die inhoud in die kosblik koel hou.
Reël 4
Zirts tjop-tjop jou eie sous. Gebruik dit as ‘n smeer, as sous by oorskiet pasta, as ‘n dip saam met groentestokkies of vrugte of om opbouende kos bietjie meer vloeibaar te maak. Meng en gebruik dit saam met enige souse, naamlik:
- Humus (kekerertjies, sesamesaadjies, olyfolie en knoffel).
- Tzatziki sous naamlik natuurlike ongegeurde jogurt met fyngesnyde komkommer.
- Verpulp oorblywende tamatie en uie sous gemeng met klein bietjie tamatiesous soos verkies.
- Enige oorblywende groente, meng met gemaalde avocado.
- Groentepesto sous waar oorskiet groente met ongegeurde jogurt, fetakaas en paar neute gezirts word.
- Ongegeurde jogurt opgekikker met bietjie kaneel en heuning of paar druppels vanielje-essens.
- Grondboontjiebotter (wees versigtig vir verstik) verpak in ‘n klein tupperware houertjie.
- Ongegeurde, onversoete jogurt gemeng klein bietjie mayonnaise.
- Maaskaas in ‘n klein tupper bakkie.
- Fyngemaakte avokado (guacamole).
- Avokadopeer gemeng met maaskaas.
- Beetsous: versap beetskyfies, gladde maaskaas, gewone jogurt, suurlemoensap en tahini (opsioneel) tot glad.
Reël 5
Sluit maklik vrugte en groente in die kosblik in.
Maak vrugtesosaties met fermer tipes vrugte, naamlik pynappel, ferm perskes en appels.
Vrugte wat makliker as ander verpak kan word, is appels, nartjies, piesangs, druiwe en aarbeie.
Om verkleuring van gesnyde vrugte en vrugteslaai te keer, doop gesnyde vrugte in ‘n bietjie suiwer vrugtesap en laat dit droog word, soos bv. appelsap. Vrugtesosatiestokkies kan ook met vrugtesap geverf word.
Tamaties en komkommer kan toebroodjie pap maak. Pak dit eerder apart in.
Gebruik seldery, komkommerblokkies en gerasperde wortel as vulsels.
Reël 6
Probeer iets nuuts in plaas van om ‘n toebroodjie te pak. Oorweeg:
- Om te vul, bv. pitabrood of tortilla of pannekoek.
Vul met tuna, suikermielies en mayonnaise of salm met gekapte komkommer en maaskaas.
Opgesnyde groente bedien met humus.
- Rys of pasta of koeskoes, bv.:
Meng tuna met ongegeurde onversoete jogurt, gesnyde appelblokkies, cheddarkaas en okkerneute met oorskiet koeskoes
Reël 7
Spaar tyd deur vooruit te beplan. Maak groter hoeveelhede pasta of geroosterde hoender vir aandete en bêre om dit later te gebruik in ‘n slaai of as ‘n vulsel. Sommige vulsels, bv. hoender-mayonnaise, kan al die vorige aand gemaak word.
Reël 8
Vries die vorige aand al ‘n botteltjie water en pak dit in ‘n kommersiële koelpak. Die water is veeldoelig: ietsie koels om te drink, maar ook om die kosblik koel te hou. Herinner kinders ook om nie hulle kosblikke op ‘n warm plek soos in die son of op ‘n warm vensterbank te bêre nie. Maak ook seker dat hoender en vis goed verkoel is, en koel gaan bly, deur dit in ‘n klein koelpakkie te pak.
Reël 9
Lees voedseletikette. Indien jy nie daarby gaan uitkom om ‘n kosblik te pak nie, is die ideaal om produkte kies met 30-40 gram koolhidraatinhoud, 10-15 gram proteïene en ‘n maksimum 20 gram vetinhoud. Vul die produkte aan met ‘n vrug en ‘n suiwelproduk.
Reël 10
Onthou laastens, indien die kosblikkombinasie ongebalanseerd voorkom, voeg individuele items by, bv. ‘n vrug, gesnyde groente, gekookte eier, hand vol neute, vars gesnyde biltongstukkies, tuisgemaakte “trail” mix (mengsel met pretzels, neute, sade en rosyne), kaasblokkies en jogurt.
Deur: Marguerite Butler
by Marelize | Aug 3, 2023 | Vir die ouers
By Wouwtjies glo ons in balans!
Videospeletjies is ‘n gewilde vorm van vermaak vir baie mense, veral kinders. Daar is egter ‘n groeiende kommer oor die potensiële uitwerking van videospeletjies op die ontwikkeling en welstand van voorskoolse kinders, wat tussen 3 en 6 jaar oud is. In hierdie artikel sal ons ‘n paar van die voordele en nadele van videospeletjies vir hierdie ouderdomsgroep ondersoek en ‘n paar aanbevelings vir ouers en opvoeders verskaf.
Voordele van videospeletjies vir voorskoolse kinders
Sommige studies het voorgestel dat videospeletjies ‘n positiewe impak op voorskoolse kinders se kognitiewe-, sosiale- en emosionele vaardighede kan hê. Byvoorbeeld, videospeletjies kan…
- Hul aandagspan, geheue, probleemoplossing en kreatiwiteit verbeter;
- Hul samewerking, kommunikasie en empatie met ander kweek en
- Hul selfbeeld, motivering en veerkragtigheid verhoog.
Hierdie voordele kan afhang van die tipe, kwaliteit en inhoud van die videospeletjies, sowel as die konteks en duur van die spel. Videospeletjies wat opvoedkundig, ouderdomsgepas en nie-gewelddadig is, is meer voordelig as dié wat gewelddadig, verslawend of onvanpas is.
Nadele van videospeletjies vir voorskoolse kinders
Videospeletjies kan egter ook ‘n negatiewe impak op voorskoolse kinders se ontwikkeling en welstand hê. Byvoorbeeld, videospeletjies kan:
- Slaapkwaliteit en -hoeveelheid van kinders ontwrig.
- Hul risiko van vetsug, sigprobleme, spiertonus en afwykings in die skelet verhoog.
- Hulle aan skadelike of onvanpaste inhoud, soos geweld, aggressie of seksualisering blootstel.
- Hul tyd en belangstelling in ander aktiwiteite, soos lees, speel in die buitelug, of sosialisering met familie en vriende verminder.
- Hul op emosionele-, sosiale- en morele vlak benadeel.
Hierdie nadele kan groter wees as die videospeletjies oormatig, kompulsief of sonder ouerleiding of toesig gespeel word.
Aanbevelings vir ouers en opvoeders
Gebaseer op die huidige bewyse en aanbevelings van kundiges, stel ons voor dat ouers en opvoeders die onderstaande riglyne volg wanneer dit kom by videospeletjies vir voorskoolse kinders:
- Beperk die hoeveelheid tyd wat hulle aan videospeletjies spandeer tot nie meer as een uur per dag nie
- Monitor die tipe, kwaliteit en inhoud van die videospeletjies wat hulle speel en verseker dat dit geskik is vir hul ouderdom en ontwikkelingstadium.
- Moedig hulle aan om videospeletjies te speel wat opvoedkundig, interaktief en samewerkend is eerder as gewelddadig of mededingend is.
- Voorsien hulle van alternatiewe aktiwiteite wat pret, stimulerend en verrykend is vir hul fisiese-; geestelike- en sosiale ontwikkeling.
- Praat met hulle oor die videospeletjies wat hulle speel en help hulle om die verskil tussen fantasie en werklikheid te verstaan.
Videospeletjies kan ‘n bron van genot en leer vir voorskoolse kinders wees as dit met matigheid en met leiding gebruik word. Deur hierdie aanbevelings te volg, kan ouers en opvoeders voorskoolse kinders help steeds videospeletjies te kan speel, terwyl hulle die potensiële skade tot die minimum beperk.
by Marelize | Jul 26, 2023 | Vir die ouers
By Wouwtjies glo in die opbou van emotionele intelligensie!
Emosionele intelligensie (EI) is die vermoë om jou eie emosies en dié van ander te verstaan en te bestuur. EI is deurslaggewend vir die ontwikkeling van sosiale en emosionele vaardighede, soos selfbewustheid, selfregulering, empatie, kommunikasie en samewerking. Hierdie vaardighede is noodsaaklik vir akademiese sukses, geestesgesondheid en positiewe verhoudings.
Navorsing het getoon dat EI deur verskeie faktore, soos gesin, kultuur, persoonlikheid en klasklimaat, beïnvloed kan word. Klaskamerklimaat verwys na die kwaliteit van die interaksies en verhoudings tussen onderwysers en leerders, sowel as die fisiese en psigologiese aspekte van die leeromgewing. ‘n Positiewe klaskamerklimaat kan ‘n gevoel van behoort, tevredenheid, samehorigheid en motivering onder leerders bevorder, terwyl ‘n negatiewe klaskamerklimaat gevoelens van wrywing, mededingendheid, moeilikheid en vervreemding kan skep.
In Suid-Afrika, waar laerskoolkinders baie uitdagings soos armoede, geweld, trauma en diversiteit in die gesig staar, is dit belangrik om EI te bevorder deur ‘n ondersteunende en inklusiewe klaskamerklimaat. ’n Studie deur Erasmus et al. (2022) het bevind dat klaskamerklimaat ‘n sterk verband het met EI-vlakke van Suid-Afrikaanse laerskoolleerders. Die studie het ook geïdentifiseer watter klaskamerfaktore bygedra het tot of die ontwikkeling van EI inhibeer het.
Volgens die studie was tevredenheid en samehorigheid positief gekorreleer met EI-vlakke, terwyl wrywing, mededingendheid en moeilikheid negatief met EI-vlakke gekorreleer was. Tevredenheid verwys na die mate waarin leerders dit geniet om in hul klas te wees en voel dat daar in hul behoeftes voorsien word. Samehorigheid verwys na die mate van wedersydse respek en ondersteuning onder leerders en onderwysers. Wrywing verwys na die hoeveelheid konflik en spanning in die klas. Mededingendheid verwys na die klem op individuele prestasie en vergelyking met ander. Moeilikheid verwys na die waargenome moeilikheid van die werk en verwagtinge in die klas.
Die studie het voorgestel dat onderwysers EI by hul leerders kan verbeter deur ‘n positiewe klaskamerklimaat te skep wat bevrediging en samehorigheid bevorder, terwyl wrywing, mededingendheid en moeilikheid verminder word. Sommige van die strategieë wat onderwysers kan gebruik, is:
- Verskaf duidelike en konsekwente reëls en verwagtinge.
- Aanmoediging van samewerking en samewerking tussen leerders.
- Gee terugvoer en erkenning vir moeite en verbetering.
- Skep geleenthede vir leerderdeelname en keuse.
- Die gebruik van kultureel sensitiewe en relevante materiaal en aktiwiteite.
- Aanspreek van leerders se emosionele behoeftes en bekommernisse.
- Modellering en onderrig van emosionele vaardighede soos selfbewustheid, selfregulering, empatie, kommunikasie en samewerking.
Deur hierdie strategieë te implementeer, kan onderwysers hul leerders help om EI te ontwikkel wat hulle nie net in die skool sal bevoordeel nie, maar ook in die lewe.
by Marelize | Jun 19, 2023 | Vir die ouers
By Wouwtjies glo ons in goeie beplanning!
Wanneer die werk baie is en jy skryf amper elke dag ‘n vak, kan dit moeilik raak om tyd te kry vir al jou leerwerk. Teen eksamentyd moet jou opsommings reeds klaar gedoen wees. Eksamentyd is daar vir hersien en herhaal. Wanneer jy jou eksamenrooster en afbakening kry, moet jy gaan sit en vir jou ‘n studierooster uitwerk. As jy nie seker is hoe om ‘n studierooster uit te werk nie, woon ‘n studiemetodes-werkswinkel by, waar jy al die tegnieke leer hoe om reg te leer.
-
Sorteer jou leerspasie uit
Dit is belangrik dat jy op ‘n stil plek leer en dat daar genoeg spasie is vir jou om al jou boeke en opsommings by jou te hê. Sorg dat jou witbord langs jou staan sodat jy die werk kan hersien en herhaal. Kinetiese leerders moet onthou om beweging toe te pas terwyl hulle leer. Maak seker daar is niks in jou leerspasie wat jou aandag kan aftrek nie.
Sorg dat jy kleurpenne en glimpenne gebruik wanneer jy leer vir die eksamen. Soos wat jy die werk hardop leer, moet jy dit ook neerskryf. Gebruik jou opsommings en skryf jou werk oor en oor sodat jy dit makliker kan onthou.
Wanneer jy jou tydsbeplanning doen, sorg dat jy tyd inruim om ou vraestelle uit te werk. Deur ou vraestelle uit te werk, leer jy hoe die onderwysers die vrae vra en oefen jy om dit wat jy gememoriseer het, op papier neer te sit.
-
Verduidelik dit wat jy geleer het, aan iemand anders
Dis moeilik om iets te verduidelik as jy dit nie ken en verstaan nie. Werk deur jou werk en wanneer jy voel dat jy dit goed genoeg ken, verduidelik dit aan iemand anders. Jy kan dit selfs vir jou teddiebere verduidelik. Die punt is om te kyk of jy die werk verstaan en dit wat jy geleer het, kan weergee.
Moenie te lank aanmekaar leer nie. Leer maksimum 45 minute en rus vir 15 minute. As jy te lank aanmekaar leer, gaan jou brein nie alles kan onthou nie. Wanneer jy ‘n ruskans vat, probeer iets aktiefs doen sodat jou brein genoeg suurstof kan kry.
Jou brein het gesonde kos nodig om te funksioneer en die werk behoorlik te memoriseer. Hou die gemorskos en lekkers vir die vakansie en eet liewer gesond tydens eksamentyd. As jy kos eet wat jou bloedsuiker opjaag, gaan jy moeg en tam voel.
Gedurende eksamentyd kan mens gou moeg voel en gryp na kafeïen of energie-drankies. Sulke drankies kan jou dalk vir ‘n oomblik wakker laat voel, maar die moegheid gaan gou weer terugkom. Probeer liewer meer water drink.
-
Wees vóórbereid op dag van die eksamen!
Niks is erger as om in die eksamenlokaal te sit en agter te kom dat jou pen nie werk nie, of dat jy jou sakrekenaar vergeet het nie. Die aand voor die eksamen moet jy seker wees jou pen werk en dat jy ander penne het om op terug te val. Afhangende van die vak wat jy skryf, maak seker jy het alles wat jy nodig het om te skryf. Moenie die oggend voor die tyd rondhardloop op soek na iets wat jy nodig het nie. Dit gaan net onnodige spanning op jou plaas.
by Vanessa Goosen | Jun 1, 2023 | Vir die ouers
Die waarde van die bes moontlike laerskoolopleiding is baie belangrik. Hierdie fundamentele jare lê beslis die grondslag vir elke kind se toekomstige sukses op akademiese gebied, maar nét so belangrik… dit speel ook ‘n kritieke rol in hul geestesgesondheid en karaktervorming.
‘n Sterk akademiese grondslag beteken dat die basiese lees-, skryf- en wiskundige boublokke vasgelê is. Goeie laerskole maak seker dat élke kind ‘n soliede begrip van hierdie kernkonsepte het en hierdie vaardighede daagliks ontwikkel.
Dit is ook baie belangrik dat goeie laerskoolonderwys veel verder strek as net akademie. Dit speel ‘n onvervangbare rol in die sosiale- en emosionele ontwikkeling van kinders. In ‘n ideale skoolomgewing word kinders blootgestel aan baie geleenthede om hul sosiale vaardighede te ontwikkel, samewerking te bevorder en vriendskappe te vorm. Hier leer kinders klein-klein belangrike lewensvaardighede soos kommunikasie, empatie, respek en probleemoplossing.
Hier, in die laerskool, word ook ‘n veilige omgewing gebied waarin kinders hul eie identiteit ontdek en selfvertroue ontwikkel, wat uiters belangrik is vir hul persoonlike groei en selfverwesenliking. Reeds op laerskool word kinders se kulturele bewustheid gevestig… hulle leer om ‘n waardering en begrip vir alle kulture te ontwikkel. Hierdie is ‘n omgewing waar almal welkom voel en elkeen se unieke bydrae waardeer word.
As ouer is dit natuurlik ‘n belangrike besluit om die regte skool te kies wat hierdie primêre skoolonderwys vir jou kind gaan bied. Een van die voorste redes waarom Laerskool Anton van Wouw die beste opsie vir jou kind is, is die uitstaande akademiese standaarde wat hier gehandhaaf word. Die skool het ‘n sterk reputasie vir akademiese uitnemendheid en blink uit in verskeie studiegebiede. Die toegewyde en bekwame onderwysers by Laerskool Anton van Wouw verseker dat elke kind individuele aandag en ondersteuning ontvang om hul volle potensiaal te bereik. Die skool bied ook ‘n verskeidenheid buitemuurse aktiwiteite en aanvullende programme wat die leergenot versterk.
‘n Verdere rede waarom Laerskool Anton van Wouw die beste opsie is, is die omvattende en holistiese benadering tot die kind se ontwikkeling. Die skool glo in die belang van ‘n gebalanseerde opvoeding en moedig nie net akademiese sukses aan nie, maar ook fisiese, emosionele en sosiale welstand. Die skool se kurrikulum en aktiwiteite fokus op die ontwikkeling van die hele kind. Dit sluit in: sport, kuns, kultuur, sosiale interaksie en morele waardes. By Laerskool Anton van Wouw word jou kind toegerus om ‘n gebalanseerde individu te wees en suksesvol te wees in alle aspekte van sy of haar lewe.
Laerskool Anton van Wouw bied ook ‘n inklusiewe en ondersteunende omgewing vir elke kind. Hierdie skool het ‘n warm en vriendelike atmosfeer waar elke kind welkom voel. Daar word gepoog om ‘n kultuur van respek, begrip en samewerking te bevorder. Elke kind sal die geleentheid kry om vriende te maak, selfvertroue te ontwikkel en ‘n gevoel van identiteit en trots te ontwikkel. Die onderwysers en personeel by Laerskool Anton van Wouw is toegewyd en gee om oor elke kind se welstand. Hierdie ondersteunende omgewing help ons leerders om met selfvertroue te groei en te floreer.
‘n Verdere voordeel van Laerskool Anton van Wouw is die betrokkenheid van ouers by die skoolgemeenskap. Die skool moedig ouerbetrokkenheid en -samewerking aan, en dit speel ‘n belangrike rol in die sukses van die kinders. By Laerskool Anton van Wouw kry elke ouer die geleentheid om deel te wees van hul kind se opvoeding, by te dra tot die skool se aktiwiteite en ‘n ondersteunende gemeenskap te vorm met ander ouers.
Laerskool Anton van Wouw is ‘n plek waar jou kind sal floreer, sy of haar volle potensiaal sal bereik en ‘n gelukkige en suksesvolle skoolloopbaan sal hê. Deur Laerskool Anton van Wouw as jou kind se onderwysinstelling te kies, is om hul die beste geleentheid vir groei en sukses te bied.
Bronne:
https://www.education.gov.za/
https://www.unicef.org/southafrica/education
by Vanessa Goosen | May 2, 2023 | Vir die ouers
Laerskool Anton van Wouw is ’n ietwat weggesteekte juweel agter die Brooklyn Mall en in die hartjie van ’n lowerryke, rustige woonbuurt, Nieuw Muckleneuk, in Pretoria. Die skool bied ouers en kinders álles wat hul hart begeer. As waardegedrewe skool, is dit vir ons baie belangrik om ons ouers se goeie opvoeding tuis, binne ons skool voort te sit.
Laerskool Anton van Wouw is een van die oudste skole in die Oostelike voorstede van Pretoria en spog met ‘n kleurryke geskiedenis en ‘n trotse tradisie van besondere akademiese-, kulturele– en sportprestasies.
Van die belangrikste uitgangspunte by ons skool is dat ons ‘n gemeenskapsentrum is, wat goed gebalanseerde leerders aan die samelewing lewer deur alle rolspelers, soos ouers, kerke, opvoedkundiges, akademici en entrepreneurs, wat moontlik ‘n bydrae kan lewer tot die opvoeding van ons kinders, die geleentheid daartoe te bied. Om hierdie rede is ons bevoorreg om sekerlik een van die gelukkigste leerderkorpse en ‘n betrokke ouergemeenskap te hê.
Ons opvoedkundige uitgangspunt is dat ons leerders al die lewensvaardighede hier moet verwerf wat hulle nodig het om te oorleef en floreer in ‘n kompeterende Suid-Afrika, en ook in die moderne, kleinerwordende wêreld.
Laerskool Anton van Wouw het ‘n ryk geskiedenis, wat teruggaan na die vroeë jare van die twintigste eeu. Laerskool Anton van Wouw open op 27 Januarie 1925 sy deure as die Nu-Muckleneuk Skool. In Mei 1958 word aansoek gedoen om die skool na die beeldhouer, Anton Van Wouw, te vernoem.
Anton van Wouw is in 1862 in die Nederlandse stad, Driebergen, gebore. Hy het in 1890 na Suid-Afrika verhuis en is bekend vir sy realistiese beeldhouwerk. Van Wouw was ‘n groot voorstander van Afrikaans as taal, en het selfs gehelp met die ontwikkeling van ‘n Afrikaanse Bybelvertaling. Dit was dus gepas om ‘n skool wat Afrikaans as taal bevorder het, na hom te vernoem.
Die skool het in die loop van jare ‘n uitstekende reputasie opgebou. Ons is bekend vir ons akademiese uitnemendheid, asook vir puik sport- en kultuurprogramme. Baie bekende Suid-Afrikaanse sport- en kultuurpersoonlikhede, is oud-Wouwtjies.
Laerskool Anton van Wouw voed verskeie hoërskole in die omgewing. Hierdie skole sluit in: Hoërskool Menlopark; Hoërskool Waterkloof; Afrikaanse Hoër Seunskool; Afrikaans Hoër Meisieskool Pretoria; Hoërskool Garsfontein en Hoërskool Die Wilgers. Al hierdie skole bied ‘n hoë standaard van onderwys en het ‘n goeie reputasie in die omgewing.
Laerskool Anton van Wouw is ‘n moderne skool met baie goeie fasiliteite om die leerproses vir die kinders te optimaliseer. Hier is ‘n paar voorbeelde van dié topklas- fasiliteite:
- Moderne tegnologie: Alle klaskamers is toegerus met moderne onderwys-tegnologie. Elke klas het ‘n dataprojektor en internet; verskeie klasse het interaktieweborde.
- Biblioteek: Laerskool Anton van Wouw het ‘n moderne biblioteek wat ‘n wye verskeidenheid boeke en ander bronne bevat, om die kinders se leerervaring te verbeter.
- Rekenaarsentrum: Die skool het ‘n goed-toegeruste rekenaarsentrum, waar kinders toegang het tot die nuutste rekenaarsagteware en -tegnologie. Hierdie fasiliteit word gebruik om kinders se lees- en rekenaarvaardighede te verbeter.
- Sport-fasiliteite: Die skool het groot sportvelde, wat gebruik word vir atletiek, rugby, krieket, netbal en ander sportsoorte. Ons nuwe veeldoelige bane word benut vir hokkie, netbal en tennis. Ons het ook ’n verhitte swembad.
- Kuns- en kultuurfasiliteite: Laerskool Anton van Wouw moedig kuns- en kultuuraktiwiteite aan, en daar is fasiliteite vir musiek, dans, toneelspel en ander kultuuraktiwiteite.
As top Afrikaanse laerskool máák ons tyd vir u kind!
Ons wil u uitnooi om ‘n afspraak met ons te maak en u sodoende te vergewis van die kwaliteit opvoeding wat ons u kind kan bied.
